मकवानपुर प्रहरी गाँजा नियन्त्रणमा सक्रिय

काठमाडौं– गाँजा तस्करी नियन्त्रणमा ठूलो सफलता हात पारेको दाबी मकवानपुर प्रहरीले गरेको छ। शुक्रबार राति ५१ किलो गाजासहित दुईवटा गाडी नियन्त्रणमा लिएको प्रहरीले शनिबार पनि २१ किलो गाँजा समातेको छ। शनिबार राति प्रहरीले भारतीय नम्बरको एक कारसहित २ जनालाई २१ किलो गाँजासहित पक्राउ गरेको हो।

कार चालक धनुषाको मुखियापट्टी गाउँपालिका वडा नम्बर ६ का ४२ वर्षीय अशोककुमार यादव र मकवानपुरको मनहरि गाउँपालिका वडा नम्बर ९ का ४० वर्षीय राजकुमार मोक्तानलाई पक्राउ गरेको प्रहरी उपरीक्षक सुशीलसिंह राठौरले जानकारी दिए। तस्करलाई नियन्त्रणमा लिने क्रममा प्रहरीले हवाई फायरसमेत गर्नुपरेको थियो।

पूर्व–पश्चिम राजमार्ग अन्तर्गत हेटौँडा–१९ स्थित इलाका प्रहरी कार्यालय नेवारपानी अगाडि भएको चेकजाँचका क्रममा मनहरीबाट हेटौँडातर्फ आउँदै गरेको बिआर ०६ बिजि ९५१२ नम्बरको कारको डिकीमा ५ प्याकेट गाँजा बरामद गरिएको उनले बताए। उनीहरुमाथि थप अनुसन्धान भइरहेको प्रहरीले जनाएको छ।