सडक डिभिजनका निमित्त प्रमुखसहित तीन कर्मचारी घुससहित पक्राउ

काठमाडौं– सडक डिभिजन कार्यालय, सिराहाका निमित्त डिभिजन प्रमुख विनोद साहसहित तीन कर्मचारी घुससहित पक्राउ परेका छन्।

अख्तियार दुरुपयोग अनुसन्धान आयोगको टोलीले निमित्त प्रमुख साहसहित इन्जिनियर नवीनकुमार साह र सव–इन्जिनियर वीरेन्द्रकुमार साहलाई करिव १९ लाख रुपैयाँ घुस लिँदालिँदै नियन्त्रणमा लिएको हो।

डिभिजन प्रमुख साहलाई तीन लाख तथा इन्जिनियर र सव–इन्जिनियर साहलाई १५ लाख ९६ रूपैयाँ घुस रकमसहित शुक्रबार नियन्त्रणमा लिएको अख्तियारका प्रवक्ता प्रदीपकुमार कोइरालाले जानकारी दिए।

निमित्त डिभिजन प्रमुख साहले सेवाग्राहीसँग रुपनी राजविराज कुनौली सडक आयोजना निर्माणको अन्तिम बिल भुक्तानी लिने क्रममा लिएको घुस रकमसहित कार्यकक्षबाट नियन्त्रणमा लिएको अख्तियारले जनाएको छ। यस्तै, इन्जिनियर र सव–इन्जिनियर साहले पनि सोही सडकसडक आयोजना निर्माणको अन्तिम बिल भुक्तानी लिने क्रममा विभिन्न बहाना बनाई लगेको घुस रकमसहित कर्मचारी आवासभित्रबाट नियन्त्रणमा लिएको बताइएको छ।

घटनाबारे अनुसन्धान भइरहेको प्रवक्ता कोइरालाले बताए।