आज देशभर वर्षा, काठमाडौंमै हिमपातकाे सम्भावना

काठमाडौं- पश्चिमी वायुको प्रभावका कारण आज (शुक्रबार) देशका अधिकांश भूभागमा वर्षा र हिमपात भएको छ।

केही दिनअघि नेपाल भित्रिएको पश्चिमी वायुका कारण बिहीबार साँझदेखि देशका विभिन्न स्थानमा वर्षा भएको छ । आज (शुक्रबार) काठमाडौं उपत्यकासहित देशका अधिकांश भागमा वर्षा भइरहेकाे मौसम पूर्वानुमान महाशाखाले जनाएको छ।

उच्च पहाडी र हिमाली क्षेत्रमा भारी हिमपातको भएकाे मौसमविद् समिर श्रेष्ठले जानकारी दिए । उनका अनुसार सुदुरपश्चिम र कर्णाली प्रदेशका धेरैजसो उच्च पहाडी र हिमाली क्षेत्रमा भारी हिमपात भएको छ । 

काठमाडौं उपत्यका आसपासका क्षेत्रमा पनि वर्षासँगै  हिमपात हुनसक्ने सम्भावना देखिएकाे मौसमविद् श्रेष्ठले जानकारी दिए । उनका अनुसार चन्द्रगिरी, फूलचोकीलगायतका डाडाँमा हिमपातको सम्भावना देखिएको हो ।

यस्तै तराईका जिल्लाहरुमा पनि वर्षा हुने महाशाखाले जनाएको छ। पश्चिमबाट सुरु भएको वर्षा र हिमपातको क्रम पूर्वमा पुगेर सकिने छ । यसका लागि कम्तिमा तीन दिन लाग्ने जनाइएको छ।

बिहीबार काठमाडौँमा शून्य दशमलव २ मिलिलिटर वर्षा भएको थियो। हिजो डढेलधुरामा ३ दशमलव ६ मिलिलिटर वर्षा भएको महाशाखाले जनाएको छ।