उखु कृषकको आन्दोलनमा विवेकशील नेपाली दलको ऐक्यवद्धता

काठमाडौं– चिनी मिलबाट ६ वर्षदेखिको उखुको पैसा नपाएर अर्को बाली लगाउन समेत चरम आर्थिक सङ्कट भोगिरहेका श्रमजीवी उखु कृषकहरूको आन्दोलनप्रति पार्टीको ऐक्यवद्धता रहेको विवेकशील नेपाली दलले जनाएको छ। आधुनिक व्यावसायिक कृषिको मिठा नारा दशकौँदेखि सुनिए पनि तराईमधेसका उखु कृषकहरूको पीडाको अन्त्य आजसम्म नभएको दलले बताएको छ।

‘हरेक वर्ष उखु किसानहरूले उखुको मूल्यको विषयमा सङ्घर्ष गरिरहेको कुरा सर्वविदितै छ। उत्पादन लागतको तुलनामा निक्कै सस्तो दरमा चिनी मिलहरूलाई उखु बेच्नुपर्दाको पीडा त छँदै छ, वर्षौँसम्म चिनी मिलले उखुको बक्यौता मूल्य नदिए पछि कृषकहरू निक्कै मर्कामा परेका छन्। सरकारले नेपाली चिनी मिलहरूको हितलाई ध्यानमा राखेर भारतीय चिनीको आयातमा कडाइ गरे पनि नेपाली चिनी मिलहरूले एकातिर श्रमजीवी कृषकहरूको शोषण गरी नै रहेका छन् भने अर्कोतिर चाडबाडको बेलामा चिनीको मूल्य बढाएर आम(उपभोक्ताहरूलाई सास्ती दिएकै हुन्,’ विवेकशीलले भनेको छ।

चिनी मिलहरूको यस किसिमको लुटतन्त्रको अन्त्य गर्न नेपाल सरकार असक्षम भइरहेको भन्दै दलले दशकौँदेखि नगदे बालीको रूपमा उखु खेती गरिरहेका कृषकहरूको पीडामा मल्हम लगाउन नसकेसम्म नयाँ पुस्तालाई कसरी व्यावसायिक कृषितर्फ आकर्षित गर्न सकिएला ? भनेर प्रश्न गरेको छ ।

उखु कृषकहरूको सम्पूर्ण बक्यौता रकम तत्काल चुक्ता गरी उखु किसानहरूलाई राहत दिने वातावरण बनाउन तथा उखु कृषक र चिनी मिलको वर्षौँदेखिको द्वन्द्वको स्थायी निवारण गर्न यथोचित कदम चाल्न नेपाल सरकारका सम्बद्ध निकाय, निजी क्षेत्रका छाता सङ्गठनहरू तथा चिनी उद्योगीहरूसँग विवेकशील नेपाली दलले माग गरेको छ ।