कृषिमन्त्रीको दाबी- 'केही दिनमै उखु किसानको पैसा खातामै आउँछ'

काठमाडौं- कृषि तथा पशुपक्षी विकासमन्त्री घनश्याम भुसालले आगामी दिनमा उखु किसानकै खातामा अनुदानको रकम उपलब्ध हुने व्यवस्था गर्न लागिएको बताएका छन् ।

नेपाल चेम्बर अफ कमर्शले साेमबार काठमाडौंमा गरेको कार्यक्रममा उनले सरकारले केही दिनमै किसानलाई खातामै अनुदान रकम उपलब्ध गराउने बताएका हुन् ।

उनले किसानको उखु किसानको समस्या समाधान गर्न सरकार सक्रिय भएर लागेको पनि दाबी गरे । उनले भने– 'किसानका समस्या छन् । यो हामीले बुझेका छौ । चाँडै समस्या समाधान गर्नेछौ ।'

यस्तै मन्त्री भुषालले कुखुरा व्यवसायी पनि मर्कामा परेको बताए । देश कुखुराको मासुमा आत्मनिर्भर भइरहँदा उपभोक्ता र उत्पादनकर्ता दुवै मारमा परेको अवस्था रहेको बताउँदै उनले सरकार, निजी क्षेत्र र दातृ निकायले विकासको विगतका प्रयासमा निकै सुधार गरेर अघि बढ्ने बताए।

यस्तै उनले व्यावसायिक कृषि उद्यमका माध्यमबाट खाद्यान्न र तरकारीमा आत्मनिर्भर एवं रोजगार विस्तार गर्ने सोच बनाएर सरकार अघि बढिरहेको बताए ।

चेम्बर अफ कमर्शका अध्यक्ष राजेशकाजी श्रेष्ठले तयारीबिना मुलुकलाई आत्मनिर्भर गर्ने भनेर कृषिजन्य आयातमा भन्सार बढाउँदा उपभोक्ता मारमा परिरहेको बताए।

नेपाली उत्पादनलाई निर्यात गर्ने सन्दर्भमा गुणस्तर चिन्ह र प्याकिङजस्ता विषयमा प्रश्न उठाइएको अवस्था रहेको बताउँदै उनले मुलुकको ग्रार्हस्थ्य उत्पादनमा ठूलो योगदान दिएको कृषि क्षेत्रको विकासका लागि कृषकलाई मलखादमा अनुदान, कम ब्याजमा ऋण, शीतभण्डारणको सुविधा र बजारको व्यवस्था हुनुपर्ने बताए।