प्रहरीको अप्रेसनमा फेरि समातिए चिनियाँ 'ह्‍याकर'

चितवन- शंकास्पद गतिविधि गर्दै आएका चिनियाँ नागरिकमाथि निगरानी बढाएको प्रहरीले फेरि २ जनालाई पक्राउ गरेको छ ।

ह्याकरको आंशकामा चितवन प्रहरीले भरतपुरको सिजी ल्याण्डमार्कस्थित होटल फेनबाट चिनियाँ नागरिकलाई केही दिनअघि प्रहरीले पक्राउ गरेको हो ।

घरभित्रै बसेर शंकास्पद गतिविधि गरेको आंशकामा स्थानीयले प्रशासनमा खबर गरेपछि निगरानी बढाएको प्रहरीले उनीहरूलाई पक्राउ गरेको हो । प्रहरीले निगरानी बढाएपछि केही चिनियाँहरु भागेकाे प्रहरीले जनाएकाे छ । 

प्रहरीका अनुसार, यी दुई चिनियाँ नागरिकले होटल फेन प्रयोग गरेर चितवनमा ठूलो चिनियाँ लगानी भित्राउने भन्दै गतिविधि सञ्चालन गर्दै आइरहेका थिए ।

प्रहरीका अनुसार, होटलका अलावा भरतपुरका विभिन्न घर चल्तीको मूल्यभन्दा बढी रकम दिएर उनीहरूले भाडामा लिएको पाइएको छ । ३० हजार भाडाको घरलाई उनीहरूले २ लाखसम्म तिर्नेगरी सम्झौता गरेको प्रहरीले फेला पारेको छ ।

समातिएका चिनियाँलाई अभद्र व्यवहार र साइवरक्राइम कसुरअन्तर्गत अदालतबाट म्याद लिएर अनुसन्धान भइरहेको चितवनका प्रहरी प्रमुख एसपी दानबहादुर मल्लले जानकारी दिए ।

उनका अनुसार चिनियाँहरु त्यहाँबाट भागेपछि प्रहरीले उनीहरू बसेको घर तथा पार्टी प्यालेसमा सिल गरेको र थप अनुसन्धान गरिरहेको छ ।

यसअघि प्रहरीले काठमाडौंका विभिन्न स्थानबाट १ सय २२ जना चिनियाँ नागरिकलाई पक्राउ गरेको थियो । साइबर अपराध र सीमापार अपराधको आशंकामा पक्राउ परेका उनीहरुलाई अध्यागमन विभागले देश निकाला (डिपोर्ट) गर्ने प्रक्रिया अघि बढाएको छ ।