एनआरटी विजयी, पुलिस र हिमालयनले बराबरी खेले

काठमाडौं - शहीद स्मारक ‘ए’ डिभिजन लिग फुटबल प्रतियोगिताअन्तर्गत मंगलबार भएका खेलमा न्युरोड टिम (एनआरटी) विजयी भएको छ भने नेपाल पुलिस क्लब र हिमालयन शेर्पाले बराबरी खेलेका छन्।

मंगलबार सम्पन्न पहिलो खेलमा न्युरोड टिम (एनआरटी)ले सरस्वती युवा क्लबलाई ४-० गोलले पराजित गर्‍यो। एनआरटीका लागि सरोज तामाङले दुई तथा ओन्ग्विने निकेन्ग्वे र एनडेम्बा ओवानाले एक/एक गोल गरे। तामाङले खेलको ६९औँ र ८१औँ मिनेटमा तथा निकेन्ग्वले ३९औँ मिनेटमा र ओवानाले ९०औँ मिनेटमा गोल गरेका हुन्।

यस्तै त्रिपुरेश्वरस्थित दशरथ रङ्गशालामा भएको दोस्रो खेलमा पुलिस र हिमालयनले गोलरहित बराबरी खेले। पहिलो हाफमा पुलिसले गोल गर्ने अवसर पाए पनि त्यसको सदुपयोग गर्न सकेन। खेलको १३औँ मिनेटमा पुलिसका कप्तान जुमानु राईले तथा ३०औँ मिनेटमा सुमन लामाले गोल गर्ने अवसर पाएका थिए। बराबरी खेलेपछि दुवै टोलीले एक-एक अंक बाँडेका छन्।