पीपीएल क्रिकेटमा काठमाडौंद्वारा पोखरालाई ११६ रनको लक्ष्य

पोखरा- आइतबार सुरु भएको पोखरा प्रिमियर लिग पीपीएल क्रिकेटमा काठमाडौं गोल्डेन्स वारियर्सले पोखरा पल्टनसामु ११६ रनको लक्ष्य पेश गरेको छ।

पोखरा क्रिकेट रंगशालामा जारी खेलमा काठमाडौंले निर्धारित २० ओभरमा ८ विकेट गुमाउँदै ११५ रन जोडेको हो।

काठमाडौंका लागि सुबोध भाटीले सर्वाधिक ४५ रनको योगदान गरे। उनले २९ बलमा ४ छक्का र ४ चौकाको मद्दतमा ४५ रन बनाएका हुन्।

त्यस्तै गौरव तोमरले १३ र शुसन भारीले १० जोडे। अन्य व्याट्सम्यानले दोहोरो अंकको रन जोड्न सकेनन्।

राष्ट्रिय टोलीका कप्तानसमेत रहेका काठमाडौंका कप्तान ज्ञानेन्द्र मल्ल ५ बलमा १ रन बनाएर आउट भए।

पोखराका लागि रशिद खान, ललित राजवंशी र कुशल मल्लले २–२ विकेट लिए। त्यस्तै प्रथमेश डाके र रर्वजित लड्डाले १–१ विकेट लिए।

पोखरा केहीबेरमा जवाफी व्याटिङमा उत्रिँदैछ। गत वर्षको पहिलो संस्करणको उपाधि पोखराले जितेको थियो।