तिलोत्तमा ब्याडमिण्टनको उपाधि गुरुङ र थापालाई

भैरहवा– रुपन्देहीको तिलोत्तमामा सञ्चालित नगरस्तरीय दोस्रो मेयर कप खुल्ला ब्याडमिण्टन प्रतियोगिताको उपाधि सुन्दर गुरुङ र लोक थापाको जोडीले हात पारेको छ । जितसँगै उक्त जोडीले नगद ५० हजार समेत प्राप्त गरेको छ ।

प्रतियोगितामा पदम थापा र थम्मन सारुको जोडीलाई उपविजेता बनाउँदै गुरुङ र थापाको जोडी प्रथम भएको हो । उक्त जोडीले नगद ३० हजार सहित मेडल तथा प्रमाणपत्र प्राप्त गरेका छन् ।

यस्तै प्रतियोगितामा लालमणि पन्थी र अशोक प्रधान तथा मणि राना र विष्णु थापाको जोडी तृतीय हुँदै नगद १०–१० हजार सहित मेडल तथा प्रमाणपत्र प्राप्त गरेका छन् । प्रतियोगितामा उत्कृष्ट हुने जीवन पराजुलीले नगद ५ हजार प्राप्त गरेका छन् ।

प्रतियोगिताका विजयी खेलाडीहरुलाई पुस्कार प्रदान गर्दै तिलोत्तमा नगर प्रमुख बासुदेव घिमिरेले नगरपालिकाले खेल र खेलाडीको लागि धेरै भन्दा प्रतियोगिता तथा कार्यक्रम गर्ने बताए ।

तिलोत्तमा ब्याडमिण्टन क्लबको कवर्ड हल तिलोत्तमा–६ दश नम्बरमा भएको प्रतियोगितामा ४६ टिमले सहभागिता जनाएका थिए । प्रतियोगितामा एकै साथ तीनवटा प्रतिस्पर्धा गराइएको थियो । प्रतियोगितामा तिलोत्तमा नगरपालिकामा बसोबास भएका खेलाडीहरुले मात्र प्रतिस्पर्धा गरेका थिए ।

गत वर्ष भएको प्रथम मेयर कप ब्याडमिण्टन प्रतियोगिताको उपाधि मनिककुमार राना र सुन्दर गुरुङको जोडीले प्राप्त गरेको थियो ।