'ए' डिभिजन लिग आजबाट, एनटीभीमा प्रत्यक्ष प्रशारण

काठमाडौं - सहिद स्मारक 'ए' डिभिजन लिग आज (शनिबार) बाट सुरु हुँदैछ। दशरथ रंगशालामा शनिबार हुने उद्घाटन खेलमा मछिन्द्र क्लब र ब्रिगेड ब्वाईज क्लबबीच प्रतिस्पर्धा हुनेछ। खेल तीन बजेदेखि सुरु हुनेछ।

१४ क्लबले प्रतिस्पर्धा गर्ने लिगमा कुल ९१ खेल हुनेछन्। फागुन ३ गतेसम्म चल्ने प्रतियोगिताको शिर्ष टोलीले ५० लाख प्राप्त गर्नेछ। यस्तै उपविजेताले ३५ लाख र तेस्रोले २५ लाख, चौथोले १५ लाख, पाँचौंले ७ लाख र छैटौंले ५ लाख पाउनेछ।

यस्तै हरेक खेल जित्ने टिमलाई बोनस वापत थप ५० हजार दिइनेछ भने बराबरी भए १५/१५ हजार दिइनेछ। क्लबलाई तयारी खर्चको लागि एन्फाले २०/२० लाख समेत उपलब्ध गराउने भएको छ।

यस्तै प्रतियोगिताको उत्कृष्ट फरवार्ड, मिडफिल्डर, डिफेन्डर, गोलकिपर र प्रशिक्षकलाई १ लाख ५० हजार प्रदान गरिनेछ। फेयर प्ले टिमले १ लाख पाउनेछ। हरेक खेलको म्यान अफ दि म्याचले १० हजार पाउने छन्।

प्रतियोगितालाई कतार एयरवेजले मुख्य प्रायोजन गरेको छ भने प्रतियोगिताको सम्पूर्ण खेल नेपाल टेलिभिजनले प्रत्यक्ष प्रशारण गर्ने भएको छ।