आईपिएल क्रिकेट : ३३२ खेलाडीको लिलामी लिस्ट सार्वजनिक

काठमाडौं- भारतीय क्रिकेट कन्ट्रोल बोर्ड बीआईसीसीले आगामी २०२० को इन्डियन प्रिमियर लिग आईपिएल क्रिकेटका लागि ३३२ जना खेलाडीको अन्तिम लिलामी लिस्ट सार्वजनिक गरेको छ।

लिलामीका लागि दर्ता भएका ९९७ खेलाडीबाट चयन गरेर ३३२ जनाको सूची सार्वजनिक गरिएको हो।

१९ डिसेम्बरमा कोलकतामा स्थानीय समयअनुसार दिउँसो ३.३० बजे लिलामी प्रक्रिया सुरु हुनेछ।

आईपिएलमा पहिलो पटक सिउँसोको समयमा लिलामी कार्यक्रम गर्न लागिएको हो। यो लिस्टमा भारतका १८६ खेलाडी रहेका छन्। त्यस्तै १४३ खेलाडी विदेशी छन्।

त्यसैगरी आईसीसीका एसोसियट सदस्यका ३ जना खेलाडी समावेश छन्।

यसपटक पहिलो पटक अमेरिका र स्कटल्याण्डबाट आईपिएलका लागि लिलामी लिस्टमा खेलाडी समावेश भएका छन्।

अमेरिकाका अली खान र स्कटल्याण्डका जर्ज मुन्सी यसपटक लिलामी लिस्टमा परेका हुन्।

आईपिएलको लिलामी लिस्टमा नेपालबाट कुनै पनि खेलाडी परेका छैन। २०१८ को लिलामी लिस्टमा नेपालबाट सन्दीप लामिछाने र शक्ति गौचन परेकामा सन्दीपले दिल्लीबाट खेल्न पाएका छन्।

यसपटक पनि उनलाई दिल्लीले रिलिज नगरेपछि दिल्लीबाटै खेल्नेछन्।

यसपटक लिलामीका लागि राखिएको लिस्टमा सबैभन्दा बढी मूल्य २ करोडबाट सुरु हुने खेलाडीमा भारतीय परेका छैनन्।

२ करोडबाट न्युनतम मूल्य पर्ने ७ जनामा सबै विदेशी खेलाडी छन्।

१.५ करोड मूल्य न्युनतम प्राप्त गर्ने कुल १० खेलाडीमा पनि भारतका एकजना खेलाडी मात्र परेका छन्।

त्यस्तै १ करोड पर्ने कुल २३ जनामा भारतका ३ जना मात्र परेका छन्।

भारतका अधिकांश खेलाडीहरु क्लबबाट रिलिज नभएका कारण धेरै मूल्य पर्ने खेलाडीहरु लिलामी लिस्टमा नपरेका हुन्।