सागको सफलतामा प्रधानमन्त्री खुसी

काठमाडौं – प्रधानमन्त्री केपी शर्मा ओलीले हतारका बीच निर्माण भएका संरचनामासमेत सफलताका साथ १३ औं साग सम्पन्न भएकोमा खुसी व्यक्त गरेका छन्।

अस्वस्थाका कारण सागको समापन समारोहमा उपस्थित हुन नसकेपछि पठाएको भिडिओ सन्देशमा उनले साग खेलकुद सफलताका साथ सम्पन्न गर्न सहयोग गर्ने सम्पूर्ण खेल पदाधिकारी, सुरक्षाकर्मी, खेलाडी तथा दर्शकलाईसमेत धन्यवाद ज्ञापन गरे।

‘हतारमा निर्माण गरिएका संरचनामा आज साग खेलकुद सफलताका साथ सम्पन्न भएको छ। यो खुसीको कुरा हो। सागलाई सफलताका साथ सम्पन्न गर्न सहयोग गर्ने सम्पूर्णलाई धन्यवाद।’ ओलीले भने।

उनले नेपाली खेलाडीलेप्रतियोगितामा गरेको प्रदर्शन उत्कृष्ट रहेको बताए। सागले दक्षिण एसियाली मुलुकहरुकाबीच आपसी सम्बन्ध अझ प्रगाढ बनाउन सहयोग गरेको  भन्दै प्रधानमन्त्री ओलीले सम्पूर्ण देशका सरकार, खेल पदाधिकारी तथा खेलाडीलाई धन्यवाद दिए।

प्रधानमन्त्री ओलीले बुधबार विशेष सम्बोधनमार्फत खेलाडीलाई विशेष प्याकेजकोसमेत घोषणा गर्ने भएका छन्।