सागको समापन आज, ५ खेलमा प्रतिस्पर्धा हुँदै

काठमाडौं– १३ औं दक्षिण एसियाली खेलकुद (साग) आज (मंगलबार) सम्पन्न हुँदैछ। सागकाे अन्तिम दिन आज ५ खेलमा प्रतिस्पर्धा हुँदैछ।

सागअन्तर्गत आज फुटबल, बक्सिङ, बास्केटबल, जुडो र स्क्वासमा प्रतिस्पर्धा हुँदैछ। पुरुष फुटबलको फाइनलमा आज दिउँसो ३ बजे दशरथ रंगशालामा नेपाल र भुटान भिड्दैछन्।

पुरुष बास्केटबलको फाइनलमा भने भारत र श्रीलंकाबीच प्रतिस्पर्धा हुँदैछ । खेल त्रिपुरेश्वरस्थित कभर्ड हलमा दिउँसो १ बजे हुँदैछ। महिला बास्केटबलको फाइनलमा भने नेपाल र भारत दिउँसो ३ः३० मा आमनेसामने हुँदैछन्।

यस्तै, महिला बास्केटबलमा भुटान र माल्दिभ्सबीच तथा पुरुष बास्केटबलमा नेपाल र बंगलादेशबीच कास्य पदकका लागि प्रतिस्पर्धा हुँदैछ।

बक्सिङमा दिउँसो १ बजेदेखि ८ स्वर्णका लागि प्रतिस्पर्धा हुँदैछ। जुडोमा १ स्वर्णका लागि प्रतिस्पर्धा हुँदैछ।

स्क्वासको महिला र पुरुष दुवै टिम स्पर्धाको फाइनल खेल हुँदैछ। जसमा पाकिस्तान र भारत आमनेसामने छन्। पुरुषतर्फ कास्य पदकका लागि नेपाल र बंगलादेश र महिलातर्फ श्रीलंका र नेपाल प्रतिस्पर्धा गर्दैछन्।

राससका अनुसार सागको नवौं दिनसम्म भारतले १४३ स्वर्णसहित अग्रता बनाएको छ। यस्तै, नेपाल ४९ स्वर्णसहित दोस्रो स्थानमा छ।

सागको समापन समारोह साँझ ५ बजेपछि सुरु हुनेछ। समापन समारोहमा प्रधानमन्त्री केपी शर्मा ओलीले सम्बोधन गर्ने कार्यक्रम रहेको बताइएको छ।