तेह्रौँ साग : स्वर्णसहित कुन देशले कति पदक जिते ?

काठमाडौं- तेह्रौँ दक्षिण एशियाली खेलकूद (साग)मा भारतले पदक तालिकामा अग्रस्थान कायमै राखेको छ। पदक तालिकामा नेपाल दोस्रो स्थानमा छ।

शनिबारको खेल सकिँदासम्म भारतले १०६ स्वर्ण, ६९ रजत र ३५ कास्यसहित कूल २१० पदक प्राप्त गरेको छ । नेपालले हालसम्म ४३ स्वर्ण, ३३ रजत र ६२ कास्यसहित कूल १३८ पदक जितेको छ।

यस्तै श्रीलङ्का ३० स्वर्ण, ५४ रजत र ८३ कास्यसहित तेस्रो, पाकिस्तान २१ स्वर्ण, २८ रजत र ३४ कास्यसहित चौथो, बङ्गलादेश सात स्वर्ण, २२ रजत र ५४ कास्यसहित पाँचौँ, माल्दिभ्स एक स्वर्ण र दुई कास्य जित्दै छैटौँ भएको छ।

अहिलेसम्म एउटा पनि स्वर्ण पदक जित्न नसकेको भूटान छ कास्यसहित पदक तालिकाको पुछारमा छ।

यस्तै नेपालले शनिबार म्याराथन र कुस्तीमा एकएक स्वर्णपदक जितेको छ। नेपालका किरणसिंह बोगटीले पुरुष म्याराथनमा स्वर्ण जितेका हुन्।

नेपालले साग इतिहासमा २४ वर्षपछि पुरुष म्याराथनमा स्वर्ण जितेको हो । यसअघि सागमा नेपालका टीका बोगटीले म्याराथनमा स्वर्ण जितेका थिए।

यस्तै सागअन्तर्गत कुस्तीको महिला ५५ किलो तौलमा नेपालकी सङ्गीता धामीले स्वर्ण जितेकी छिन् । उनले बङ्गलादेशका खेलाडीलाई पराजित गरिन्। सागको कुस्तीतर्फ नेपाली खेलाडीले जितेको यो नै पहिलो स्वर्ण हो।

यस्ताे छ साग पदक तालिका

देश           स्वर्ण      कास्य      रजत     जम्मा

भारत          १०६         ६९         ३५          २१०
नेपाल         ४३           ३३         ६२          १३८
श्रीलङ्का      ३०           ५४         ८३          १६७
पाकिस्तान    २१           १८         ३४         ८३
बङ्गलादेश    ७             २२        ५४          ८३
माल्दिभ्स     १             ०          २           ३
भूटान         ०             ०           ६           ६