नेपाल र श्रीलंकाले अंक बाँडे

काठमाडौं - १३ औं दक्षिण एसियाली खेलकुद (साग) अन्तर्गत पुरुष फुटबलमा नेपालले श्रीलंकासँग बराबरी खेलेको छ। पहिलो हाफको ३६औं मिनेटमा कप्तान सुजल श्रेष्ठले पेनाल्टीमार्फत गोल गर्दै दिलाएको अग्रता इन्जुरी समयको दोस्रो मिनेटमा टुट्न पुग्यो। श्रीलंकाले खेलको ९२औं मिनेटमा पाएको फ्रिकिकलाई उत्कृष्ट गोलमा परिणत गर्दै नेपालसँग अंक बाँड्यो।

श्रीलंकाली डिफेन्डरले अनन्त तामाङको टाउकोमा हानेपछि नेपालले पेनाल्टी पाएको थियो। उक्त अवसरलाई सुजलले गोलमा परिणत गरेका थिए। पहिलो हाफमा अग्रता बनाएको नेपाल खेल सकिन केही मिनेट बाँकी रहँदा बराबरी गोल खान पुग्यो। पहिलो हाफको तुलनामा दोस्रोमा आक्रामक खेल प्रदर्शन गरेको श्रीलंकाले खेलको अन्त्यतिर पाएको अवसरलाई जज सुपानले गोलमा परिणत गरे। उनको सशक्त प्रहारलाई नेपालका गोलरक्षक विकेश कुथुले ठम्याउनै सकेनन्।

श्रीलंकासँगको बराबरीसँगै नेपालले दुई खेलबाट चार अंक जोडेको छ। भुटानले समान खेलबाट ३ तथा माल्दिभ्स र श्रीलंकाले २/२ र बंगलादेशले १ अंक जोडेको छ। नेपालले यसअघिको खेलमा भुटानलाई ४-० ले पराजित गरेको थियो।