साग फुटबलमा आज नेपालले भुटानको सामना गर्दै

काठमाडौं– १३ औं दक्षिण एसियाली खेलकुद प्रतियोगिता (साग)अन्तर्गत पुरुष फुटबलमा मंगलबार (आज) नेपालले भुटानको सामना गर्दैछ।

प्रतियोगिताअन्तर्गत नेपालले समूह चरणको आफ्नो पहिलो खेल खेल्न लागेको हो। खेल काठमाडौंस्थित दशरथ रंगशालामा हुँदैछ।

नेपाल खेल जितेर प्रतियोगितामा सुखद सुरुवात गर्न चाहान्छ। तर, नेपाललाई खेल जित्न त्यति सजिलो छैन।

भुटान पुरुष फुटबलमा दक्षिण एसियामा बलियो टोली मानिन्छ।

भुटान भने जित दोहोर्याउने रणनीतिका साथ मैदान उत्रिँदैछ।

यसअघि प्रतियोगिताअन्तर्गत सोमबार भएको पहिलो खेलमा भुटानले बंगलादेशलाई १–० ले पराजित गरेको थियो। सोही दिन भएको अर्काे खेलमा श्रीलंका र माल्दिभ्सले बराबरी खेलेका छन्।

महिला फुटबलमा भने नेपालले श्रीलंकासँग प्रतिस्पर्धा गर्दैछ। नेपालले प्रतियोगिताअन्तर्गत श्रीलंकासँग पहिलो खेल खेल्न लागेको हो।

खेल पोखरास्थित पोखरा रंगशालामा हुँदैछ।

आजै हुने दोस्रो खेलमा भारत र माल्दिभ्सले प्रतिस्पर्धा गर्दैछन्।