प्रसन्न रहन पूर्वराजाले गरे षोडस उपचार पूजा

भैरहवा - साताव्यापी धार्मिक भ्रमणका लागि भैरहवा आएका पूर्वराजा ज्ञानेन्द्र शाहले सोमबार रुपन्देहीस्थित सैनामैनामा रहेको पोर्वहा बोलबमधाममा पूजापाठ गरेका छन्।

पश्चिमको पशुपतिनाथ मन्दिर भनेर प्रसिद्ध उक्त मन्दिरमा पूर्वराजा शाहले षोडस उपचार विधिद्वारा पूजा गरेका हुन्।

मन्दिरका मूल गुरु एवं प्रमुख संरक्षक धर्मगुरु व्यास आर्चाय अर्थात किशोर गौतमले उक्त पूजा प्रसन्नताका लागि गरिने बताए।

‘षोडसी मन्त्रबाट शिवजीको पूजा गरिन्छ। जसले व्यक्तिमा प्रसन्नता ल्याउनमा मद्दत गर्छ।’ गौतमले भने, ‘पूर्वराजाको प्रसन्नता र मनोकामना पूर्ण गर्न यो मन्त्र विधिबाट पूजा गराएका छौं। यो पूजामा विभिन्न १६ वटा सामाग्रीले पूजा गरिन्छ।’

पूजा गर्न भैरहवाबाट सैनामैना पुगेका पूर्वराजा शाहको दर्शन गर्नेको भिड लागेको थियो। मन्दिर तथा आसपासका क्षेत्रमा सर्वसाधारणहरु भेला भएका थिए।
मन्दिरमा आएका साधुसन्तहरुले हिन्दु धर्म स्थापनाका लागि पहल गर्न पूर्वराजा शालाई आग्रह गर्नुका साथै बिन्ती पत्रसमेत दिएका थिए।