साग महिला क्रिकेट : एकै खेलमा चार विश्व कीर्तिमान

काठमाडौं- १३ औं दक्षिण एसियाली खेलकुद प्रतियोगिता (साग)अन्तर्गत महिला क्रिकेटमा चार विश्व कीर्तिमान कायम भएका छन्।

पोखरा रंगशालास्थित क्रिकेट ग्राउन्डमा सोमबार सम्पन्न नेपाल र माल्दिभ्सविरुद्धको खेलमा कीर्तिमान कायम भएका हुन्।

यी हुन् कायम भएका विश्व कीर्तिमान

उत्कृष्ट बलिङ फिगर

नेपालकी अञ्जली राईले बलिङ फिगरमा कीर्तिमान कायम गरेकी छन्। उनले २.१ ओभरमा रन नखर्चिएर ६ विकेट लिइन्। यसअघि यो कीर्तिमान मलेसियाकी आस अलिसाको नाममा थियो । उनले ४ ओभरमा १ मेडनसहित ३ रन खर्चेर ६ विकेट लिएकी थिइन्।

सबैभन्दा बढी खेलाडी शून्य रनमै आउट

खेलमा माल्दिभ्सका ९ खेलाडी शून्य रनमै आउट भएका छन्। अन्तर्राष्ट्रिय टी–२० क्रिकेटमा यो कीर्तिमान भएको प्रशिक्षक जगत टमटाको दाबी छ।

सबैभन्दा कम स्कोर

खेलमा माल्दिभ्स १६ रनमै अलआउट भएको छ। यो अन्तर्राष्ट्रिय टी–२० क्रिकेटमा एक टिमले बनाएको कम स्कोर हो ।

कम बल खेलेर जित

१७ रनको लक्ष्य पछ्याएको नेपालले ५ बलमै बिना विकेट गुमाएर जित हासिल गर्यो। यो अन्तर्राष्ट्रिय टी–२० क्रिकेटमा सबैभन्दा कम बलमै हासिल गरिएको जित हो।