क्रिकेटमा अञ्जलीको कीर्तिमान, नेपालद्वारा माल्दिभ्स १० विकेटले पराजित

काठमाडौं- नेपाली महिला क्रिकेट टोलीकी तीव्र गतिकी वलर अञ्जली चन्दले टी–२० अन्तर्राष्ट्रिय महिला क्रिकेटमा विश्व कीर्तिमान बनाएकी छन्।

१३औं सागअन्तर्गत महिला क्रिकेटमा माल्दिभ्सविरुद्धको खेलमा २.१ ओभरमा २ मेडनसहित बिनारन ६ विकेट लिएर अञ्जलीले कीर्तिमान बनाएकी हुन्।

यसअघि मलेसियाकी आस अलिसाले ४ ओभरमा १ मेडनसहित ३ रन खर्चेर ६ विकेट लिएकी थिइन्। अञ्जलीले ९ औं ओभरको पाँचाैँ र छैटाैँ तथा ११औं ओभरको पहिलो वलमा विकेट लिँदै ह्याट्रिक पूरा गरेकी हुन्।

उनले चार खेलाडीलाई क्याच आउट र दुई खेलाडीलाई वोल्ड आउट गरेकी छिन्।

अञ्जलीको राम्रो प्रदर्शनकै काराणले माल्दिभ्स १०.१ ओभरमा १६ रनमा अलआउट भएको छ।

माल्दिभ्सका ९ खेलाडीले खाता नै खोल्न सकेनन्।

माल्दिभ्सकी हफ्सा अफ्सा अब्दुल्लाले ४ र हामना नियाजले ९ रन बनाए। माल्दिभ्सविरुद्ध करुणा भण्डारीले दुई विकेट लिइन्।

माल्दिभ्सले दिएको १७ रनको लक्ष्य नेपालले ५ बलमा विना विकेटको क्षतिमा पूरा गर्यो। अब नेपालले डिसेम्बर ४ मा बंगलादेश र डिसेम्बर ६ मा श्रीलंकासँग खेल्नेछ। शीर्ष दुई टोलीले स्वर्णका लागि प्रतिस्पर्धा गर्नेछन्।