सागको उद्घाटन आज : २६ खेलमा प्रतिस्पर्धा हुने

काठमाडौं- बहुप्रतिक्षित दक्षिण एसियाली खेलकुद (साग) को १३औं संस्करण आज (आइतबार )बाट औपचारिक रुपमा सुरु हुँदैछ ।

आज साँझ ५ बजे राष्ट्रपति विद्यादेवी भण्डारीले उद्घाटन गरेसँगै १३औं संस्करणले औपचारिकता पाउनेछ।

आजबाट मंसिर २४ गतेसम्म गरी कुल १० दिन चल्ने यस सागका खेलहरु काठमाडौं, पोखरा र जनकपुर गरी तीन सहरमा आयोजना हुँदै छ। यस खेलकुदमा २६ खेलको सहभागिता रहेको छ।

काठमाडौं मा २१, पोखरामा ८ र जनकपुरमा १ खेल आयोजना हुनेछन। प्रतियोगितामा नेपालसहित, भारत, बंगलादेश, भुटान, माल्दिभ्स, पाकिस्तान र भुटान गरी ७ सहभागी ७ राष्ट्रका खेलाडीले ३ सय २४ स्वर्ण, ३ सय २४ रजत र ४ सय ८७ कांस्य गरी कुल १ हजार १ सय ३५ पदकका लागि प्रतिस्पर्धा गर्नेछन्।

सागमा खेलाडी, प्रशिक्षक तथा व्यवस्थापक गरी कुल ३ हजार ७ सय ९ जना सहभागी हुँदै छन्। जसअन्तर्गत सातै देशका सहभागी खेलाडीको संख्या २ हजार ९ सय र ७ सय ६९ अफिसियल रहेका छन्।

सागमा नेपालबाट सर्वाधिक ५ सय ९४ खेलाडीले सहभागिता जनाउनेछन्। त्यस्तै व्यवस्थापक तथा प्रशिक्षक गरी एक सय ८६ जना पनि सहभागी हुनेछन्।

नेपालमा सागको आयोजना २० वर्षपछि हुन लागेको हो । यसअघि सागका पहिलो खेल नेपालमै सन् १९८४ मा भएको थियो भने सन् १९९९ मा नेपालले दोस्रो पटक साग आयोजना गर्ने अवसर पाएको थियो । जुन प्रतियोगिताको आठौं संस्करण थियो।