संक्रमणबाट जोगाउन ओलीलाई केही दिन आईसीयूमै राखिने

काठमाडौं - प्रधानमन्त्री केपी शर्मा ओलीलाई अझै केही दिन आईसीयूमा राखिने भएको छ। मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा ‘एपेन्डिसाइटिस’ सहित ‘पेरिटोनाइटिस’ (पेटको संक्रमण) देखिएपछि गत मंगलबार प्रधानमन्त्री ओलीको शल्यक्रिया गरिएको थियो।

सम्भावित संक्रमणबाट जोगाउन ओलीलाई आईसीयूमै राखिने उपचारमा संलग्न चिकित्सकले बताए।

उपचारमा संलग्न डा. सुवास आचार्यले पेटको घाउ आलै रहेका कारण बाहिर सारे अन्य संक्रमण हुने जोखिम भएकाले प्रधानमन्त्री ओलीलाई आईसीयूमै राखिएको बताए। शल्यक्रियाको प्रभाव र यसको संक्रमण नियन्त्रण भइसकेपनि पछि देखिन सक्ने जटिलता र संक्रमणको डर मात्र रहेको उनले बताए।

प्रधानमन्त्रीका निजी चिकित्सक डा. दिव्यासिंह शाहले ओली खतरामुक्त रहेको जानकारी दिइन्। प्रधानमन्त्रीको मिर्गौला प्रत्यारोपणको समयलाई धेरै पर नसार्ने डा. शाहले बताइन्।