नागरिकता र लाईसेन्सको आधारमा मतदान गर्न पाइने

काठमाडौं- शनिबार (मंसिर १४ गते) हुन लागेको उप निर्वाचनमा मतदाताले नागरिकता, लाइसेन्सलगायतका परिचय पत्रको आधारमा पनि मतदान गर्न पाउने भएका छन्।

निर्वाचन आयोगका अनुसार मतदाता परिचय पत्र नलिएका, लिएर हराएका वा त्रुटी भएका मतदाताले नेपाल सरकारले जारी गरेका कुनै पनि परिचय पत्रका आधारमा मतदान गर्न पाउने निर्वाचन आयोगले जनाएको छ।

शुक्रबार निर्वाचन आयोगले एक विज्ञप्ती जारी गरी मतदाता सम्बन्धित निर्वाचन क्षेत्रका मतदाता नामावलीमा नाम भएका मतदाताले परिचय पत्र नभएका आधारमा मतदानबाट बञ्चित हुनु नपर्ने जनाएको हो।

प्रतिनिधिसभा सदस्य तथा प्रदेशसभा सदस्य उपनिर्वाचन निर्देशिका र स्थानीय तह उपनिर्वाचन निर्देशिका २०७६ बमोजिम ‘सानोतिनो भूलचुक’ मानी अन्य परिचयपत्रका आधारमा मतदान गर्न पाउने व्यवस्था गरिएको आयोगले जनाएको छ।

मतदाता परिचय पत्र नभएका मतदातालाई मतदान गर्न दिने प्रबन्ध मिलाउन सम्बन्धित मुख्य निर्वाचन अधिकृत, निर्वाचन अधिकृत, मतदान अधिकृतलाई निर्देशन दिइसकेको जनाइएको छ।

उपनिर्वाचन अन्तर्गत प्रतिनिधिसभा सदस्यका लागि कास्की क्षेत्र नम्बर २ मा मतदान हुँदैछ। त्यस्तै, प्रदेशअन्तर्गत दाङ क्षेत्र नम्बर ३ को ‘ख’, बाग्लुङ क्षेत्र नम्बर २ ‘ख’ र भक्तपुर–१ ‘ख’ मा मतदान हुँदैछ।

त्यस्तै शनिबार नै स्थानीय तहमा चार प्रमुख, एक उपप्रमुख र ४२ वडाध्यक्षका लागि पनि मतदान हुँदैछ।