पुरुष भलिबलमा स्वर्ण जित्ने नेपालको सपना अधुरै

काठमााडौं - १३ औं दक्षिण एसियाली खेलकुद (साग) को पुरुष भलिबलमा उपाधि जित्ने नेपालको सपना भारतले चकानाचुर बनाइदिएको छ। पहिलो खेल बंगलादेशसँग हार्दै सेमिफाइनल प्रवेश सम्भावनालाई कठिन बनाएको नेपाल समूह चरणको अन्तिम खेल भारतलाई सुम्पिँदै प्रतियोगिताबाट बाहिरिएको छ।

नेपाल समूह चरणबाटै बाहिरिँदा यस समूहबाट भारत समूह विजेता र बंगलादेश उपविजेता बन्दै सेमिफाइनल प्रवेश गरेका छन्।

शुक्रबार त्रिपुरेश्वरस्थित कवर्डहलमा भएको महत्वपूर्ण खेलमा नेपाल उपाधि दाबेदार भारतसँग सोझो सेटमा पराजित भयो। तीनै सेटमा नेपालले खराब प्रदर्शन गर्‍यो। नेपाल भारतसँग १५-२५, १३-२५ र १६-२५ ले पराजित भयो।

नेपालले पहिलो खेल बंगलादेशसंग निकै प्रतिस्पर्धात्मक खेले पनि जीत दर्ता गर्न नसक्दा सेमिफाइनल यात्रालाई निकै महंगो पर्न गयो।

बंगलादेशसँग नेपालले पहिलो सेट २५-२१ ले जितेको थियो। तर दोस्रो सेट २३-२५ ले गुमायो। फेरी तेस्रो सेट २५-१९ ले आफ्नो पक्षमा पारेको नेपाल चौथो सेटमा २४-२६ले पराजित भयो। अन्तिम सेट पनि नेपालले १२-१५ ले गुमायो।

समूह‘ए’ मा नेपालसहित भारत र बंगलादेश छन्। त्यस्तै समुह ‘बी’ मा श्रीलंका, माल्दिभ्स र पाकिस्तान छन्।