कर्णालीमा हिमपात, जनजीवन कष्टकर

सुर्खेत- कर्णालीका चार जिल्लामा बिहीबार राति हिमपात भएको छ।

हिमाली जिल्ला डोल्पा, हुम्ला, मुगु र जुम्लामा हिमपात भएको हो। हुम्लामा सबैभन्दा धेरै हिमपात भएको छ। त्यहाँ बिहीबार रातिदेखि शुक्रबार बिहान ८ बजेसम्म हिमपात भएको हाे। सदरमुकाम सिमकोट र आसपासका डाँडा हिउँले ढाकिएका छन्। यस्तै, रलिङ, पंचमुखी, चाङला हिमालमा पनि हिउँ परेको छ। 

हिमपातका कारण त्यस क्षेत्रमा चिसो बढेको छ। हुम्लामा तापक्रम घटेर माइनस ३ डिग्री पुगेको छ। हुम्लाकी प्रमुख जिल्ला अधिकारी विनिता भट्टराईले हिमपातपछि बादल लाग्दा चिसो बढेको बताइन्। चिसोका कारण यस क्षेत्रको जनजीवन कष्टकर भएको उनको भनाइ छ।

यस्तै, डोल्पा, जुम्ला र मुगुमा पनि हिमपात भएको त्यहाँस्थित जिल्ला प्रहरी कार्यालयले जनाएका छन्। जिल्ला प्रहरी कार्यालय, जुम्लाका डिएसपी लालबहादुर धामीले जिल्लाका डाँडामा हिमपात भएको बताए।

हरेक वर्ष वर्षा भएपछि हिउँ पर्ने गरेको भए पनि यस वर्ष भने त्यसअगावै हिउँ परेको स्थानीयले बताएका छन्।