पुरुष भलिबलमा नेपाल र भारतको प्रतिस्पर्धा आज, नेपाललाई जित्नै पर्ने दबाब

काठमाडौं- १३ औं दक्षिण एसियाली खेलकुद (साग) प्रतियोगिताअन्तर्गत पुरुष भलिबलमा नेपालले दक्षिण एसियाको पावर हाउस मानिने भारतको आज (शुक्रबार) सामना गर्दैछ।

नेपालले प्रतियोगिताअन्तर्गत समूह चरणको दोस्रो तथा अन्तिम खेल भारतसँग खेल्न लागेको हो। खेल त्रिपुरेश्वरस्थित कभर्डहलमा साँझ ५ बजे सुरु हुनेछ।

नेपाललाई सेमिफाइनलको आशा जिवितै राख्न भारतसँगको खेल जित्नै पर्ने दबाब छ। तर, नेपाललाई खेल जित्न सजिलो छैन। किनकि नेपाल भारतसँग लगातार पराजित भइरहेको छ। सागको तयारीका लागि भारतसँगका तीन मैत्रीपूर्ण खेलमा पनि नेपाल सोझो सेटमै पराजित भएको थियो।

जारी प्रतियोगितामा नेपालको सुरुवात सुखद हुन सकेन। प्रतियोगिताको उद्घाटन खेलमा नेपाल बंगलादेशसँग ३–२ले पराजित भयो।

भारत भने प्रतियोगिताको पहिलो खेल खेल्दैछ।

आजै हुने समूह ‘बी’को खेलमा श्रीलंका र माल्दिभ्स राति ७ बजे प्रतिस्पर्धा गर्दैछन्।