'साग'मा १९ हजार सुरक्षाकर्मी

काठमाडौं - १३ औं दक्षिण एसियाली खेलकुद (साग)लाई व्यवस्थित र प्रभावकारी बनाउन सुरक्षा व्यवस्थालाई चुस्त बनाइनुका साथै सवारीसाधन सञ्चालनमा विशेष ध्यान दिइने भएको छ।

साग सुरक्षाका लागि करिब १९ हजार सुरक्षाकर्मीसमेत परिचालन गरिने भएको छ। सागको प्रचार समितिले बिहीबार आयोजना गरेको पत्रकार सम्मेलनमा प्रहरी महानिरीक्षक सर्वेन्द्र खनालले १८ हजार ९ सय ३३ सुरक्षकर्मी परिचालन हुने जानकारी दिए। प्रतियोगितामा सहभागी खेलाडी, खेलमैदान र होटेलहरूको सुरक्षा व्यवस्था कडा बनाइने खनालले बताए।

यस्तै ट्राफिक प्रहरीले चक्रपथभित्र मंसिर १५ र २४ गते जोरबिजोर प्रणाली लागू गर्ने भएको छ। साग उद्घाटनको दिन मसिंर १५ गते बिजोर संख्याको सवारी चलाउनु पर्नेछ भने मंसिर २४ अर्थात समापनको दिन जोर संख्याका सवारी चलाउनु पर्ने छ।

यस्तै सागको समयमा पुराना गाडी नचलाउन ट्राफिक प्रहरीले अनुरोध पनि गरेको छ। ठूला सवारी साधनहरुलाई चक्रपथभित्र सञ्चालन गर्न रोक लगाइने भएको छ भने सकभर बैकल्पिक बाटोको प्रयोग गर्न ट्राफिकले अनुरोध गरेको छ। सागमा प्रयोग हुने सवारी साधानको पार्किङका लागि भने टुडिखेलमा व्यवस्था गरिएको छ। प्रतियोगिताको औपचारिक उद्घाटन आइतबार भएपनि सागको भलिबल खेल बुधबारबाटै सुरु भइसकेको छ।