अर्घाखाँची बस दुर्घटना : १० मृतकको सनाखत

काठमाडौं- अर्घाखाँचीमा बुधबार भएको बस दुर्घटनामा परी ज्यान गुमाउने १९ जनामध्ये १० को सनाखत भएको छ।

जिल्ला प्रहरी कार्यालय, अर्घाखाँचीका प्रहरी नायब उपरीक्षक (डिएसपी) प्रकाश विष्टका अनुसार दुर्घटनामा अर्घाखाँची, सन्धिखर्क-७ का शिवलाल भट्टराई, माया पुरी, बलराम भट्टराई र मोनिका खड्काले ज्यान गुमाएका छन्। 

यस्तै, सन्धीखर्क- १० का छविलाल गैरु, शिवगंगा-२ का सन्तबहादुर बस्नेत र भूमिकास्थान-९, शैलेस थापा, कपिलवस्तु, चप्परगाउँकी सीता बस्नेत, बुद्धभूमिका ओमबहादुर थापा र गुल्मी, धुर्कोट-२ का राजकुमार महतको दुर्घटनामा ज्यान गएको छ।

अन्य मृतकको सनाखत हुन बाँकी छ।

सन्धिखर्क नगरपालिका-६, नरपानी रातामाटामा लु२ख २१४८ नम्बरको बस दुर्घटना हुँदा चालकसहित १९ जनाको ज्यान गएको थियो। 

प्रहरीका अनुसार बस सडकबाट करिब ५ सय मिटर तल खसेको थियो।

झण्डै तीन साताअघि नरपानीको रातामाटा भएको कार दुर्घटनामा एकै परिवारका तीन जनाको ज्यान गएको थियो।