महिला भलिबलमा भारतको सामना गर्दै नेपाल

काठमाडौं- १३ औं दक्षिण एसियाली खेलकुद (साग) प्रतियोगिताअन्तर्गत महिला भलिबलमा नेपालले आज (बिहिबार) भारतको सामना गर्दैछ।

समूह चरणको दोस्रो खेलमा नेपालले प्रतियोगिताकै दाबेदार मानिएको भारतसँग खेल्न लागेको हो। खेल त्रिपुरेश्वरस्थित कभर्डहलमा दिउँसो ३ बजे सुरु हुनेछ।

नेपाल जसरी पनि आजको खेल जित्ने लक्ष्यमा छ। तर, भारतविरुद्धको खेल जित्न त्यति सहज छैन।

महिला भलिबलमा भारत नेपालभन्दा बलियो टिम मानिन्छ। यसअघि नेपालमै भएको दक्षिण एसियाली महिला भलिबल प्रतियोगितामा भारतले नेपाललाई सहजै पराजित गर्दै उपाधि जितेको थियो। त्यसकारण नेपाललाई आजको खेल जित्न चुनौती देखिन्छ। तर, प्रतियोगिताको पहिलो खेल जितेकाले नेपालको मनोबल उच्च छ। उक्त खेलमा नेपालले बंगलादेशलाई ३-० को सोझो सेटमा हराएको थियो।

भारत भने प्रतियोगिताअन्तर्गत पहिलो खेल खेल्दैछ। त्यसकारण भारतलाई पनि खेल जित्न दबाब छ। 

नेपाल समूह ‘ए’ मा छ। यो समूहमा भारत र बंगलादेश छन्।