१३ औं साग : पुरुष भलिबलमा नेपाल बंगलादेशसँग पराजित

काठमाडौं- १३औं दक्षिण एसियाली खेलकुद (साग) प्रतियोगिताअन्तर्गत पुरुष भलिबलको उद्घाटन खेलमा नेपाल बंगलादेशसँग पराजित भएको छ।

त्रिपुरेश्वरस्थित कभर्डहलमा भएको खेलमा नेपालले बंगलादेशलाई २-३ को नतिजा सुम्पियो। पहिलो सेट २५-२१ ले जितेको नेपालले दोस्रो सेट २३-२५ले गुमायो । तेस्रो सेट नेपालले २५-१९ ले आफ्नो पक्षमा पार्याे। निकै प्रतिस्पर्धात्मक बनेको चौथो सेटमा नेपाल २४-२६ ले पराजित भयो । १५ अंकमा निर्णय हुने पाँचौं सेटमा नेपाल १२-१५ ले पराजित भयो।

जितसँगै बंगलादेशले २ अंक पायो। नेपालले भने १ अंकमा चित्त बुझाउनुपर्यो। पाँचौं सेटसम्म पुगेकाले नेपालले उक्त अंक पाएको हो।

पुरुष भलिबलमा नेपाल समूह ‘ए’ मा छ। उक्त समूहमा भारत र बंगलादेश छन्। समूह ‘बी’ मा श्रीलंका, पाकिस्तान र माल्दिभ्स छन्।

साग मंसिर १५ मा उद्घाटन हुने भए पनि भलिबल खेल भने बुधबार सुरु भएको हो। प्रतियोगिताअन्तर्गत यसअघि भएको महिला भलिबलमा भने नेपालले बंगलादेशलाई ३–० को सोझो सेटमा पराजित गरेको छ।