प्रधानमन्त्री ओलीको एपेन्डिक्स अपरेसन सफल

काठमाडौं– आज बिहान महाराजगन्जस्थित त्रिवि शिक्षण अस्पतालमा रहेको मनमोहन कार्डियोथोरासिक भास्कुलर एन्ड ट्रान्स्सप्लान्ट सेन्टरमा भर्ना भएका प्रधानमन्त्री केपी शर्मा ओलीलाई एपेन्डिसाइटिस भएपछि एपेन्डिक्सको अपरेसन गरिएको छ ।

प्रधानमन्त्री ओलीका प्रेस सल्लाहकार सूर्य थापाले सुखद् समाचार भन्दै प्रमको अपरेसनको जानकारी ट्विटरमा सेयर गरेका छन् ।

ओलीलाई आज बिहान सीसीयूमा भर्ना गरिएको थियो । पेट दुखेपछि उनलाई अस्पताल लगिएको थियो ।

उपचारमा प्रा.डा. अरुण सायमी, प्रा.डा. रमेशसिंह भण्डारी, डा. दिव्या सिंहलगायत संलग्न थिए । एपेन्डिसाइटिस भएमा जतिसक्दो चाँडो शल्यक्रिया गर्नुपर्ने हुन्छ ।

प्रधानमन्त्रीलाई सघन उपचारको व्यवस्थासहित निरन्तर निगरानीमा राखिएको र उनको स्वास्थ्य स्थिर रहेको अस्पतालले जनाएको छ ।

यसअघि प्रधानमन्त्री ओलीको मिर्गौलामा समस्या आएपछि डायलासिस गरिएको थियो ।