सन्दीप लामिछानेले 'साग' गुमाउने

काठमाडौं - नेपाली राष्ट्रिय क्रिकेट टोलीका लेग स्पिनर सन्दीप लामिछानेले दक्षिण एसियाली खेलकुद (साग) गुमाउने भएका छन्। सोमबार दुबै आँखाको सामान्य शल्यक्रिया पछि उनले खेल गुमाउने भएका हुन्।

नेपाली राष्ट्रिय टिमका टिम म्यानेजर रमण सिवाकोटीले दिएको जानकारी अनुसार सन्दीपले १५ दिन आराम गर्नुपर्ने भएपछि उनी साग खेलमा सहभागी नहुने भएका हुन्। उनको सोमबार बिहान तिलगङ्गा अस्पतालमा दुवै आँखाको शल्यक्रिया भएको थियो। टाढाको बस्तु धमिलो देख्ने भएपछि उनको सल्यक्रिया गरिएको सिवाकोटीले बताए।

सन्दीप टिमबाट बाहिरिएपछि नेपालले उनको स्थानमा रोहित कुमार पौडेललाई टिममा बोलाईएको छ । यस अघि साग खेल्ने टिममा रोहित वैकल्पिक खेलाडीको रुपमा रहेका थिए।

सागमा नेपालले पहिलो खेल श्रीलंका यू२३सँग मंसिर १७ मा खेल्ने छ। यस्तै मंसिर १९ मा भुटान, मंसिर २० मा माल्दिभ्स तथा मंसिर २१ मा बंगलादेश यू२३सँग खेल्ने छ। भारत र पाकिस्तानले भने क्रिकेटमा सहभागिता जनाएका छैनन्।