रानी–धरान ६ लेन सडकमा एकरुपता ल्याउन मुख्यमन्त्रीसँग माग

इटहरी । चीन र भारत जोड्ने रानी–धरान ६ लेन सडक अन्तर्गतको इटहरी खण्डमा निर्माणाधिन सडक मापदण्डविपरीत भएको भन्दै संघर्ष समितिले प्रदेश एक सरकारको ध्यानाकर्षण गराएको छ । इटहरीमा रहेका सक्रिय युवाहरुले संघर्ष समिति बनाई राजमार्ग साँघुरो बनाएको विषयमा विरोध गर्दै आएका छन् भने स्थानीय सरकारदेखि सडक आयोजनाको कार्यालयसम्म पुगी ध्यानाकर्षण गराएका छन् ।

समितिका संयोजक मदन चुुँडालले भारत–चीन जोड्ने बहुुप्रतिक्षित व्यापारिक सडकलाई केहि व्यक्तिको अग्रसरतामा साँघुुरो बनाउने प्रपञ्ज रचिएको भन्दै प्रदेश सरकारको गम्भिर ध्यानाकर्षणका लागि आग्रह गरे । ‘राष्ट्रिय राजमार्ग जस्तो सडक चौडा बनाउने काम मनपरी गरिएको छ,’ उनले भने, ‘दीर्घकालिन महत्वको विषयमा तीनै तहको सरकारको निष्क्रियताप्रति जनताले प्रश्न उठाइरहेका छन् ।’

ज्ञापनपत्र बुझ्दै मुख्यमन्त्री शेरधन राईले ६ लेन सडकको डिपिआरमै समस्या आएकाले सडकको विभिन्न भागको मापदण्ड फरक हुन पुुगेको जानकारी दिए । उनले इटहरी क्षेत्रको विवादको बारेमा भने सडक आयोजनासँग तुरुन्त जवाफ माग्ने बताए । उनले भने, ‘इटहरी क्षेत्रको बारेमा कहाँ समस्या भएको छ म जानकारी लिन्छु ।’

२०६८–०६९ को आर्थिक वर्षबाट शुरु भएको रानी–धरान ६ लेन सडकको जम्मा लम्वाइ ४९ किलोमिटर रहेको छ । भारतको जोगवनी र चीनको किमाथांका क्षेत्र जोड्ने यो सडक त्रिदेशीय महत्वको सडक हो ।