'लाइसेन्स' लिएका हतियार पनि बुझाउन गृहको आह्वान

काठमाडौं- गृह मन्त्रालयले लाइलेन्स लिएर प्रयोग गरिएका हतियार पनि बुझाउन सर्वसाधरणलाई आह्वान गरेको छ ।

मंसिर १४ गते हुन लागेको उपनिर्वाचलाई लक्षित गरि गृहले हतियार बुझाइदिन आह्वान गरेको हो । गृहले एक विज्ञप्ति जारी गर्दै यहि मंसिर १० गतेभित्र सबैहतियार बुझाउन भनेको छ।

गृहले निकालेको विज्ञप्तिमा भनिएको छ– 'आगामी मंसिर १४ गते देशका विभिन्न ३७ जिल्लाहरुमा हुन गइरहेको उपनिर्वाचनलाई निष्पक्ष, शान्तिपूर्ण र भयरहित वातावरणमा सम्पन्न गराउन हातहतियार खरखजना ऐन, २०१९ को दफा ८ बमोजिम उक्त जिल्लाका विभिन्न व्यक्तिहरुसँग रहेको इजाजत प्राप्त हातहतियारहरु यहि मंसिर १० गते भित्र स्थानीय प्रहरी कार्यालयहरुमा अनिवार्य रुपमा बुझाउन सम्बन्धित सबैलाई जानकारीका लागि यो सूचना प्रकाशित गरिएको छ ।'

उपनिर्वाचन सम्पन्न भएपछि इजाजत प्राप्त हतियार सम्बन्धित व्यक्तिले फिर्ता लैजान सक्ने गृहका अधिकारीहरुले बताएका छन् ।