बूढीगण्डकी प्रभावित धर्नामा, डा. भट्टराईले दिए साथ

काठमाडौं । बूढीगण्डकी जलविद्युत आयोजनाको प्रभावित क्षेत्रमा मुआब्जा तोक्न माग गर्दै प्रभावित क्षेत्रका स्थानीय जिल्ला प्रशासन कार्यालय गोरखा अगाडि धर्ना बसेका छन् । धर्नामा पूर्वप्रधानमन्त्रीसमेत रहेका समाजवादी पार्टी नेपालका अध्यक्ष डा. बाबुराम भट्टराई पनि सहभागी भएका थिए ।

बूढीगण्डकी प्रभावित गोरखातर्फ आरूघाट, आर्खेत र धादिङतर्फ खहरेका बासिन्दा, जनप्रतिनिधिलगायत बिहीबार जिल्ला प्रशासन कार्यालय गोरखामा धर्ना दिन पुगेका हुन् । भट्टराई गोरखा–२ बाट निर्वाचित सांसदसमेत हुन् ।

धर्ना बसेको फोटो ट्विटरमा राख्दै भट्टराईले भनेका छन् ‘बूढीगण्डकी परियोजनाको मुआब्जा वितरणमा लामो समयदेखि भएको ढिलाइ अन्त्य गर्न र तुरून्त उचित मुआब्जा वितरण गर्न दबाब दिन गोरखा जिल्ला प्रशासन कार्यालय अगाडि जनप्रतिनिधिहरू र सरोकारवालाहरूको धर्ना ! यो महत्वपूर्ण राष्ट्रिय गौरवको परियोजनाका समस्या हल गर्न सरकारको तुरून्त ध्यान पुगोस् ।’