सागमा नेपालका ५ सय ९९ खेलाडीले २७ खेलमा प्रतिष्पर्धा गर्दै

काठमाडौं - मंसिर १५ देखि २४ गतेसम्म आयोजना हुने दक्षिण एसियाली खेलकुद (साग)का लागि नेपालबाट सहभागी हुने खेलाडीको टुंगो लागेको छ। साग तयारी समितिले मंगलबार पत्रकार सम्मेलन गर्दै सागमा आयोजक नेपालबाट ५ सय ९९ जना खेलाडीले प्रतिस्पर्धा गर्ने जानकारी दिएको छ।

यसपटकको सागमा नेपालबाट तीन सय १२ पुरुष र २ सय ८७ महिला खेलाडी सहभागी हुनेछन्। सागका खेलहरु काठमाडौं, पोखरा, बर्दिया र जनकपुरमा हुनेछन्।

काठमाडौंमा एथ्लेटिक्स, बक्सिङ, ब्याटमिन्टन, फेन्सिङ, गल्फ, जुडो, कराते, सुटिङ, स्क्वास, टेबल टेनिस, पौडी, तेक्वान्दो, टेनिस, भारत्तोलन, उसु, साइक्लिङ, भलिबल, पुरुष फुटबल, क्रिकेट, बास्केटबल र कबड्डी हुनेछन्।

पोखरामा बीच भलिबल, आर्चरी, प्याराग्लाइडिङ, ह्याण्डबल, महिला फुटबल हुनेछन्। बर्दियामा खो खो र जनकपुरमा कुस्ती खेल हुने छ।

समितिका संयोजक रिम बहादुर रानाभाटले नेपालले सबै २७ खेलमा प्रतिस्पर्धा गर्ने जानकारी दिए। उनले नेपालले कम्तिमा पनि ५० स्वर्ण जित्ने लक्ष्य राखेको बताए। सागका लागि २१ खेलको प्रशिक्षण विदेशमा र बाँकी नेपालमै भइरहेको छ।

सागको तयारीका लागि परिषदले करिब ४५ करोड रुपैयाँ बजेट छुट्याएको थियो। त्यसमा अधिकांश टिमले बैदेशीक प्रशिक्षण गरेका छन्।