नेपाललाई पहिलो सफलता, करनले लिए विकेट

काठमाडौं- बंगलादेशमा जारी एसीसी इमर्जिङ एसिया कप क्रिकेटअन्तर्गत बंगलादेशविरुद्धको खेलमा नेपालले पहिलो सफलता हात पारेको छ।

नेपालका लागि करन केसीले पहिलो विकेट लिएका हुन्। उनले खेलको ५.५ ओभरमा बंगलादेशका सौम्य सरकारलाई ११ रनमा सन्दीप जोराद्वारा क्याच आउट गराए।

१३९ रनको लक्ष्य पछ्याउँदै ब्याटिङ गरिरहेको बंगलादेश ८ ओभर सकिँदा एक विकेट गुमाएर ३८ रनमा खेलिरहेको छ। एमडी नैम शैख २१ रनमा खेलिरहँदा नजमुल सान्टोले भने रन जोड्न सकेका छैनन्।

यसअघि टस हारेर ब्याटिङ गरेको नेपालले ४४.३ ओभरमा सबै विकेट गुमाएर १३८ रन जोडेको थियो। नेपालका लागि सोमपाल कामीले सर्वाधिक ३८ रनको योगदान दिए। ६३ बल सामना गरेका कामीले चार चौका प्रहार गरेका थिए। यस्तै, कप्तान ज्ञानेन्द्र मल्लले २६, करन केसीले १८, आरिफ शेखले ११ र कुशल भुर्तेलले १० रनको योगदान दिए। अन्य खेलाडीले दोहोरो अंकको रन जोड्न सकेनन्।

बलिङतर्फ स्याद मिनहजुल अबेदिन र सुमोन खानले सर्वाधिक तीन-तीन विकेट लिए। यस्तै, मेहदी हसन र एमडी तनवीर इस्लामले समान दुई विकेट लिए।

जारी प्रतियोगिताको समूह चरणअन्तर्गत नेपाल र बंगलादेशको यो तेस्रो तथा अन्तिम खेल हो।