भारतलाई टी-२० क्रिकेट शृंखला

काठमाडौं- भारतले बंगलादेशसँगको टी-२० क्रिकेट शृंखला जितेको छ।

आइतबार राति भएको खेलमा बंगलादेशलाई ३० रनले पराजित गर्दै भारतले शृंखला २-१ ले जितेको हो। यसअघि पहिलो खेलमा पराजित भएको भारतले दोस्रो खेलमा पुनरागमन गरेको थियो।

शृंखला अन्तर्गतको अन्तिम खेलमा दीपक चाहरले कीर्तिमानी विकेट लिएपछि भारतले सहजै जित निकाल्यो।

१७५ रनको चुनौती पछ्याउँदै ब्याटिङ गरेको बंगलादेशले १९.२ ओभरमा सबै विकेट गुमाएर १४४ रनमा सीमित भयो। बंगलादेशका लागि मोहम्मद नाइमले ८१ रन बनाए पनि अन्य खेलाडीले राम्रो प्रदर्शन गर्न सकेनन्। त्यस्तै, मोहम्मद मिथुनले २७ रन जोडे।

चाहरले ३.२ ओभरमा सात रन खर्चिएर ६ विकेट लिए। यो टी-२० क्रिकेटको उत्कृष्ट बलिङ फिगर हो। यसअघि यो कीर्तिमान श्रीलंकाका स्पिनर अजन्ता मेन्डिसको नाममा थियो। उनले जिम्बाबेविरुद्ध ८ रन खर्चिएर ६ विकेट लिएका थिए।

यसअघि टस हारेर पहिले ब्याटिङ गरेको भारतले निर्धारित २० ओभरमा पाँच विकेटको क्षतिमा १७४ रन बनाएको थियो। भारतको लागि श्रेयस ऐयरले ६६ र केएल राहुलले ५२ रन बनाएका थिए।

बंगलादेशका लागि सौम्य सरकार तथा साफिउल इस्लामले समान दुई विकेट लिँदा अल अमिन हुसेनले एक विकेट चट्काए।

चाहर खेलको प्लेअर अफ दि म्याच र प्लेअर अफ सिरिज घोषित भए। उनले शृंखलामा ८ विकेट लिएका छन्।