नेपालले एमसीसीसँग टी-ट्वान्टी खेल्दै

काठमाडौं - नेपाल भ्रमणमा रहेको मेरिलेबोन क्रिकेट क्लब (एमसीसी) ले आज (शनिबार) यू-१९ र सिनियर मिश्रीत टोलीसँग टी-ट्वान्टी खेल्दैछ।

खेल ११ बजे टियु क्रिकेट मैदानमा सुरु हुने छ। सिनियर टोलीका प्रशिक्षक उमेश पटवालले नेपाली टोलीको कप्तानी युवा खेलाडी रोहित कुमार पौडेलले गर्ने जानकारी दिएका छन्। आजको खेलमा सिनियर टोलीका ठूला खेलाडी भने हुने छैनन्। उनीहरुलाई आराम दिइएको छ भने युवा टोलीलाई मैदानमा उतार्ने तयारी प्रशिक्षक पटवालले गरेका छन्।

आजको खेलमा रोहितसँगै अमित श्रेष्ठ , सन्दीप जोरा, अभिनास बोहोरा, कमलसिंह ऐरी, नन्दन यादव, कुशल भुर्तेल, सुसन भारी तथा राशिद खानलगातका खेलाडीले स्थान बनाउने सम्भावना रहेको छ।

एमसीसीको टोलीमा भने कुनै परिवर्तन हुने छैन। पहिलो एकदिवसीय खेलमा एमसीसीसंग नेपाली यू-१९ टिम ३८ रनले पराजित भएको थियो।

टी-ट्वान्टी पछि एमसीसी टिम पोखरा जानेछ। त्यहाँ उसले पोखरा आमन्त्रण-११ र मुख्यमन्त्री-११ संग दुई टी-ट्वान्टी क्रिकेट खेल्नेछ।