रोड्रिग्वको ह्याट्रिकमा रियलको फराकिलो जित

काठमाडौं- ब्राजिलियन युवा रोड्रिग्वले ह्याट्रिक गरेपछि च्याम्पियन्स लिग फुटबलमा रियल मड्रिडले फराकिलो जित निकालेको छ।

बुधबार राति भएको खेलमा रियल मड्रिडले टर्किस क्लब गलातासारेमाथि ६-० गोलको फराकिलो जित निकालेको हो।

खेलमा करिम बेन्जिमाको दुई र सर्जियो रामोले एक गोल गरे। खेलको चौथो मिनेटमा रोड्रिग्वको गोलबाट रियलले अग्रता लिएको थियो। सातौं मिनेटमा रोड्रिग्वको गोलबाट नै रियलले अग्रता दोब्बर बनायो। १४ औं मिनेटमा सर्जियो रामोसले पेनाल्टीमा गोल गर्दै रियललाई ३-० को अग्रता दिलाए। पहिलो हाफको अन्तिम मिनेटमा करिम बेन्जिमाले गोल गर्दै रियललाई पहिलो हाफमा ४-० को फराकिलो अग्रता दिलाए। ८१ औं मिनेटमा बेन्जेमाले नै व्यक्तिगत दोस्रो गोल गर्दै रियललाई ५-० को स्थितिमा पुर्याए। खेलको इन्जुरी समयमा रोड्रिग्वले गोल गर्दै ह्याट्रिक पूरा गरे।

समूह ‘ए’मा रहेको रियलले ४ खेलबाट ७ अंक जोड्यो। रियललाई नकआउट चरणमा छनोट हुन २ अंक आवश्यक छ।

एजेन्सी