एएफसी यु-१९ च्याम्पियनसिप : नेपाल र युएई भिड्दै

काठमाडौं - एएफसी यु-१९ च्याम्पियनसिप छनोटको पहिलो खेलमा आज (बुधबार) नेपालले संयुक्त अरब इमिरेट्स (युएई)को सामना गर्दैछ।

इरानको तेहारानस्थित पिएएस स्टेडियममा हुने खेल नेपाली समयअनुसार साँझ ५ बजे सुरु हुनेछ।

प्रतियोगितामा नेपाल समूह ‘डी’ मा रहेको छ। नेपालको समूहमा किर्गिस्तान, युएई र इरान रहेका छन्। नेपालले दोस्रो खेल इरानसँग २२ गते र तेस्रो खेल २४ गते कीर्गिस्तानसँग खेल्नेछ।

नेपाली टोलीको गोलकिपरमा विशाल सुनार, रोहित कार्की र पुजन होना छन् भने डिफेन्डरमा विशाल बस्नेत, रन्दीप पौडेल, पदम भट्टराई, अशिम गुरुङ, नवीन गुरुङ, रोशन डोङ, विकास खवास, योगेश गुरुङ र निराजन महर्जन छन्।

त्यसैगरी मिडफिल्डरमा दर्शन गुरुङ, रञ्जन पुन, आकाश बुढामगर, जय गुरुङ, मनिष थापा, अनिल महर्जन र दिनेश हेम्जन तथा फर्वाडमा मनिष डाँगी, राजीव लोप्चन, रेजिन सुब्बा र दीपेश आले मगर छन्।