अफगानिस्तान: राष्ट्रपति सहभागी कार्यक्रममा विस्फोट, कम्तीमा २४ को मृत्यु 

अफगानिस्तानमा भएको एउटा आत्मघाती बम आक्रमणमा कम्तीमा २४ जना मारिएका छन् । 

परवान प्रांतमा आयोजित राष्ट्रपति अशरफ गनी सहभागी र्‍यालीमा भएको उक्त आक्रमणमा ३४ जना घाइते भएको अन्तर्राष्ट्रिय सञ्चारमाध्यमहरुले जनाएका छन् । राष्ट्रपति अशरफ गनी भने सुरक्षित रहेको बताइएको छ । 

यो आक्रमणको अहिलेसम्म कसैले जिम्मेवारी लिएको छैन । 

अफगानिस्तानमा सेप्टेम्बर महिनाभित्रै निर्वाचन हुँदैछ । यसैबेला हिंसाका घटनाहरुमा समेत वृद्धि भएको छ । आजै काबुलमा भएको अर्को एक विस्फोटमा तीन जनाको मृत्यु भएको छ । 

विद्रोही तालिबान र अमेरिकाबीचको शान्ति वार्ता अचानकै रोकिएपछि हिंसा झन् बढेको हो । तालिवानले अफगानिस्तानमा आम निर्वाचन हुनै नदिने भनेको छ ।