प्रदेश १ : मुख्यमन्त्री नियुक्त भएलगत्तै भीम आचार्यको शपथ

विराटनगर– प्रदेश १ का नवनियुक्त मुख्यमन्त्री भीम आचार्यले शपथ ग्रहण गरेका छन्। अहिले अन्य मन्त्री नियुक्ति नगरिने भएको छ।

विराटनगरको होटल एसियाटिकमा बिहीबार संसदीय दलको बैठक बसेर दलको नेता चयन भएका आचार्यलाई आजै मुख्यमन्त्री नियुक्त गरेर शपथ गराइएको हो। 

संविधानको धारा १६८ (१) अन्तर्गत बनेको शेरधन राई नेतृत्वको सरकार विघटन गरी सोही धारा अनुसार आचार्यको नेतृत्वमा पुनः एमालेको एकल सरकार गठन भएको हो। 

आचार्यले संविधान अनुसार ३० दिनभित्र पुनः विश्वासको मत लिनुपर्नेछ। प्रदेश १ को मुख्यमन्त्रीबाट शेरधन राईले आजै प्रदेश प्रमुख सोमनाथ प्यासी अधिकारीसमक्ष राजीनामा दिएलगत्तै आचार्यले शपथ ग्रहण गरेका हुन्।