एमाले नेता भीम आचार्यका भाइ घरमै मृत भेटिए

विराटनगर– प्रदेश १ को मुख्यमन्त्री बन्ने तयारीमा रहेका एमाले नेता भीम आचार्यको परिवारमा शोक परेको छ। नेता आचार्यका सहोदर भाइ राम आचार्य आज बिहान घरमै मृत अवस्थामा फेला परेका हुन्। 

सुनसरीको इनरुवा–३ महेन्द्रचोक निवासी ५६ वर्षीय आचार्य मृत अवस्थामा भेटिएको र घटनाको अनुसन्धान भइरहेको सुनसरी प्रहरी प्रमुख एसपी सञ्जय सिंह थापाले बताए। प्रहरी टोली उनको घरमा पुगेको छ। आचार्य मृत भेटिएको कोठाको चुकुल भित्रबाट लगाइएको पाइएको बताइएको छ।

उनलाई मुधमेह, उच्च रक्तचाप र डिप्रेसनको पुरानै समस्या रहेको बताइएको छ। बिहान १०ः३० बजेतिर प्रहरीले घटना थाहा पाएको हो। घटनालगत्तै प्रहरी टोलीले आचार्यको घरमा पुगेर घटनाको अनुसन्धान थालेको छ।