'धर्तीमाता'लाई थप सात दिन हिरासतमा राख्‍न आदेश

काठमाडौं- 'धर्तीमाता' भनेर दाबी गर्ने बुटवलकी विष्णु कुँवरलाई थप सात दिन थुनामा राख्न जिल्ला प्रशासन कार्यालय काठमाडौंले अनुमति दिएको छ ।

गत शुक्रबार बिहान बालाजुबाट पक्राउ परेकी कुँवरमाथि अनुसन्धानका लागि सात दिनको म्याद थपिएको महानगरीय प्रहरी परिसर काठमाडौंका प्रवक्ता होविन्द्र बोगटीले जानकारी दिए । परिसरको टोलीले युवतीमाथि सार्वजनिक ठाउँमा यातना दिएको आरोपमा पक्राउ गरेको थियो । 

काठमाडौंको भद्रकाली मन्दिरमा उनले बोक्सी झार्ने भन्दै एक युवतीलाई बर्बर यातना दिएको भिडियो सामाजिक सञ्जालमा भाइरल भएको थियो ।  उनले ती युवतीमाथि जाइलाग्दै ‘निस्किन्छेस् कि निस्किन्नस्, तेरो मासु खाम्ला, मलाई चिन्’ लगायत शब्द प्रयोग गरेर गालीगलौज र हातपात गरेको उक्त भिडियोमा देख्न सकिन्छ। 

उक्त भिडियो सार्वजनिक भएपछि प्रहरीले उनलाई पक्राउ गरेको हो । कानुनले सार्वजनिकस्थलमा हातपात गर्नुलाई अपराध मानेको छ। उनले गरेका अन्य अपराधका विषयमा पनि प्रहरीलाई जानकारी आएकाले गम्भीर ढङ्गले अनुसन्धान भइरहेको प्रवक्ता बोगटीले जानकारी दिए ।