विप्लवका गतिविधि नियन्त्रण हुन्छ : सरकार 

काठमाडौं– हिंसात्मक गतिविधि गरिरहेको नेत्रविक्रम चन्द विप्लवको गतिविधि नियन्त्रण गर्ने सरकारले दोहोर्‍याएको छ। नेपाल सरकारका प्रवक्ता तथा सूचना प्रविधि तथा संचारमन्त्री गोकुल बास्कोटाले सरकारले विप्लव समूहका गतिविधि नियन्त्रण गरेरै छाड्ने दाबी गरे।
 
मन्त्रीपरिषदको निर्णय सार्वजनिक गर्न मन्त्रालयमा आयोजित पत्रकार सम्मेलनमा बोल्दै बास्कोटाले विप्लव समूहसँग सरकारले निरन्तर वार्तागरेपनि हिंसात्मक बाटोमा अगाडि बढेकाले उसका गतिविधि नियन्त्रण गर्ने बताएका हुन्।  

विप्लव समूह प्रतिक्रान्ति, हिंसात्मक बाटोमा अगाडि बढेको र समाजमा आतंक फैलाएको र देशलाई सधै गरिब राष्ट्र बनाउने बाटोमा अगाडि बढेकोले शान्ती सुरक्षा कायम गर्न र संविधानको रक्षा गर्न उसका गतिविधि माथि नियन्त्रण लगाइएको बाँस्कोटाले बताए।

सरकारले विप्लव समूहसँग वार्ता गरि समाधान खोज्न सांसद सोम प्रसाद पाण्डेको संयोजकत्वमा अधिकार सम्पन्न वार्ता टोली गठन गरेको थियो। विप्लव समूहले उक्त सरकारी वार्ता टोलीसँग वार्ताको औचित्य नभएको भन्दै वार्तामा आएको थिएन।