धनगढी - जलस्रोत तथा सिँचाइ विकास डिभिजन कार्यालय कञ्चनपुरका दुई जना कर्मचारी घुससहित पक्राउ परेका छन्। अख्तियार दुरुपयोग अनुसन्धान आयोगको कार्यालय कञ्चनपुरबाट खटिएको टोलीले घुस रकमसहित उनीहरुलाई पक्राउ गरेको हो।
आयोगको टोलीले कार्यालयका डिभिजन अधिकृत अजित कुमार श्रिवास्तव र ईन्जिनियर तथा सूचना अधिकारी ग्रिस्मा ठगुन्नालाई दुई लाख घुस रकम सहित बिहीबार पक्राउ गरेको हो।
भीमदत्त नगरपालिका -१९ को चौधर नदी नियन्त्रण उपभोक्ता समितिका अध्यक्ष मिलन सिंहसँग दुई लाख घुस मागेको र उनले घुस बापतको रकम कार्यालयमा बुझाउने क्रममा पक्राउ गरिएको अख्तियारको कञ्चनपुर कार्यालयले जनाएको छ।
नगद सहित पक्राउ परेका उनीहरूलाई थप कारबाहीका लागि अख्तियार दुरुपयोग अनुसन्धान आयोगको केन्द्रीय कार्यालय पठाउने अख्तियार दुरुपयोग अनुसन्धान आयोग कञ्चनपुरले जनाएको छ।
प्रकाशित: Dec 31, 2017| 18:23 आइतबार, पुस १६, २०७४
