विराटनगर, इटहरी, धरानः कस्को बजेट कस्तो ?

इटहरी- स्थानिय सरकारले बजेट ल्याइसक्ने समयसिमाको अन्तिम दिन मंगलबार प्रदेश १ का मुख्य तीन सहर धरान, इटहरी र विराटनगरले पनि बजेट ल्याएका छन ।  

प्रदेश १ का दुइ उपमहानगरपालीकाहरु धरान र इटहरीको एकमुस्ट बजेट भन्दा विराटनगर महानगरपालीकाको बजेट १ अर्ब ४६ करोड भन्दा बढि आएको छ । 

विराटनगर महानगरपालीकाले ५ अर्ब, १२ करोड, ३० लाख, ९० हजारको बजेट ल्याएको छ । 

उपप्रमुख इन्दिरा कार्कीले प्रस्तुत गरेको बजेटमा विराटनगरका सिङ्गिया र केसलिया खोलामा तटबन्धसँगै पार्क निर्माण गर्ने, नदिजन्य पदार्थको अवैध उत्खनन अन्त्य गर्ने, मेयर कम मिनि ओलम्पीक तथा आत्मरक्षाको तालिम दिने उपमेयरसँग किशोरी जस्ता कार्यक्रम संचालन गर्ने महानगरको बजेटमा उल्लेख गरिएको छ ।
  
इटहरीले १ अर्ब, ८५ करोड, ५० लाखको बजेट ल्याएको छ । उपमेयर लक्ष्मी गौतमले इटहरी उपमहानगरको सांस्कृतिक भवनमा भएको नगरसभामा उक्त बजेट प्रस्तुत गरेकि थिइन । 

इटहरीमा अनलाइनबाट घरनक्सा पास तथा एकिकृत सम्पत्ति करको भुक्तानीको व्यवस्था, औद्योगिक ग्राम र जनजाती ग्राम स्थापना जस्ता महत्वकांक्षि कार्यक्रमहरु इटहरीले सार्वजनिक गरेको छ ।
 
धरान उपमहानगरपालीकाले १ अर्ब ८० करोडको बजेट ल्याएको छ । कार्यवाहक मन्जु भन्डारीले धरानमा रहेको गोरखा डिपार्टमेन्टको सभाहलमा आयोजित नगरसभामा बजेट प्रस्तुत गरेकि थिइन ।  

एक वडा एक पार्क सहित धरानलाइ पार्कको सहर बनाउने तथा वैशाखपछि कुनै आयोजना सम्झौता नगर्ने जस्ता आकर्षक कार्यक्रमहरु धरानले ल्याएको छ ।