काबुलमा महिलालाई घरबाहिर निस्कन प्रतिबन्ध

काबुल– अफगानिस्तानमा तालिवानले नागरिकलाई काबुल विमानस्थल जान र महिलालाई घरबाहिर निस्कन प्रतिबन्ध लगाएको छ। पश्चिमा फौजसँगै देश छोड्न चाहने अफगानीको संख्या बढेसँगै तालिवानले बुधबार आफ्ना नागरिकलाई यस्ता प्रतिबन्ध लगाएको हो।  

तालिवान प्रवक्ता जाबिहुल्लाह मुजाहिदले राजधानी काबुलमा आयोजित पत्रकार सम्मेलनमा आफ्ना नागरिकमाथि प्रतिबन्ध घोषणा गर्दै ती प्रतिबन्ध उल्लंघन गरे कारबाही गरिने चेतावनी दिएका छन्। ‘सम्पूर्ण नागरिकलाई काबुल विमानस्थल जाने बाटो बन्द छ। आदेश उल्लंघन गर्नेमाथि कडा कारबाही हुन्छ,’ प्रवत्ता मुजाहिदले भने। 

महिलामाथि हुन सक्ने दुव्य कारण घरभित्र बस्न बाध्य पारिएको उनले बताए। मुजाहिदले विमानस्थलमा पुगेका अफगानीलाई पनि तत्काल फर्कन आग्रह गरे। उनले भने,  ‘विदेशी फौजसँगै विमानस्थलमा पुगेका अफगानीलाई तुरुन्त घर फर्कन आह्वान गर्छ। हामी उनीहरुलाई विदेश जान दिन्नौं।’ उनीहरुकै सुरक्षाका लागि महिलालाई घरभित्र बस्न भनिएको उनले बताए ।

तालिवान प्रवक्ताले विदेशी सेनालाई तोकिएको समयभित्र देश छोड्नसमेत चेतावनी दिए। अफगानिस्तानमा अलपत्र परेका विदेशी सेनालाई नेटो फौज र पश्चिमा मुलुकका जहाजबाट उद्धार गरी विमानस्थल लैजान सकिने उनको भनाइ थियो।