९ हजार पदका लागि साढे २ लाखको आवेदन

काठमाडौँ- लोकसेवा आयोगले स्थानीय तहका लागि खुलाएको विज्ञापन विवादित बनेपनि आवदेन दिनेको संख्या भने अत्याधिक देखिएको छ ।

९ हजार १ सय पदका लागि खुलाइएको विज्ञापनमा शनिबार बेलुकासम्ममा साढे २ लाख बढिले आवेदन भरेका छन् । 

असार ३ गतेसम्म फाराम भर्ने मिति तोकिएकोमा अनलाइन फाराम भर्न केही समस्या आएपछि आयोगले असार १० गतेसम्मका लागि अवधि थप गरेको छ । अन्तिम समयमा आयोगको अनलाइनले काम नगरेपछि म्याद थपिएको हो । 

शनिबार साँझसम्म दुई लाख ५५ हजार ७२६ परीक्षार्थीले अनलाइन फाराम भरेका छन् । जसमध्ये दुई लाख ५२ हजार ७६३ खुला, ६१ हजार ८०० महिला, २७ हजार ५०४ जनजाति आदिवासी, १६ हजार २५२ मधेसी, एक हजार ९७४ दलित, १०२ अपाङ्गता भएका र ८३ पिछडिएको क्षेत्रबाट फाराम भरेको जानकारी आयोगका प्रवक्ता किरणराज शर्माले दिए । 

आयोगको विज्ञापनको विषय अहिले सर्वोच्च अदालतमा विचाराधिन छ । विज्ञापन खारेज गर्नु पर्ने र विज्ञापन कायम गर्नु पर्ने मागसहित परेका छुट्टा छ्ट्टै निवेदनलाई एकै ठाउँमा राखेर हेर्ने तयारी गरेको छ ।