भारत विजयी, अफगानिस्तानको लगातार छैठौं हार

एजेन्सी- आइसिसी एकदिवसीय विश्वकप क्रिकेटमा अफगानिस्तानले लगातार छैठौं हार ब्यहोरेको छ । शनिबार भारतसँग भएको खेलमा ११ रनले पराजति हुँदै अफगानिस्तानले प्रतियोगितामा लगातार छैठौं हार ब्यहोरेको हो । 

भारतले दिएको २ सय २५ रनको सामान्य लक्ष्य पछ्याएको अफगानिस्तानले ४९.५ ओभरमा सबै विकेट गुमाउँदै मात्र २ सय १३ रन बनाउन सक्यो । अफगानिस्तानका लागि मोहम्मद नाबीले ५२  रनको अर्धशतकीय पारी खेले पनि टोलीको जितका लागि प्रयाप्त भएन् । उनले ५५ बलमा ४ चौका र १ छक्का प्रहार गर्दै ५२ रन जोडेका हुन् । त्यस्तै रहमत शाहले ३६ रन जोडे । उनले ६३ बलमा ३ चौका प्रहार गर्दै ३६ रन जोडेका हुन् । 

कप्तान गुल्बदिन नाइबले २७, हस्मतुल्लाह शाहिदी र नाजिबुल्लाह जाड्रानले समान २१-२१ तथा राशिद खानले १४ रन जोडे । भारतका लागि मोहमद सामीले चार तथा हार्दिक पाण्डेय, युजेन्द्र चाहल र जसप्रित बुम्राहले समान दुई दुई विकेट लिए ।

यसअघि टस जितेर पहिले ब्याटिङ गर्ने निर्णय गरेको भारतले निर्धारित ५० ओभरमा ८ विकट गुमाउँदै २ सय २४ रन जोडेको थियो । भारतका लागि कप्तान विराट कोहलीले अर्धशतकीय पारी खेले । ओपरन ब्याट्सम्यान रोहित शर्मा १ रनमा पेभिलियन फर्के पछि मैदान प्रवेश गरेका कप्तान कोहलीले ६७ रनको अर्धशतकीय पारी खेलेका हुन् । 

उनले ६३ बलमा ५ चौका प्रहार गर्दै ६७ रनको योगदान दिए । कोहलीले दोस्रो विकेटका लागि अर्का ओपनर ब्याट्सम्यान केएल राहुलसँग ५८ रनको साझेदारी गरेका थिए । राहुल ५३ बलमा २ चौका प्रहार गर्दै ३० रनमा पेभिलिएन फर्किए ।

त्यस्तै केदार जाधवले अर्धशतकीय पारी खेले । उनले ६७ बलमा ३ चौका र १ छक्काको मद्दतमा ५२ रनको अर्धशतकयि पारी खेलेका हुन् । विजय शंकरले ४१ बलमा २ चौका सहित २९ रन जोड्दा महेन्द्र सिंह धोनीले ५२ बलमा ३ चौका सहित २८ रन जोडे ।

अफगानिस्तानका लागि मोहम्मद नाबी र गुल्बादिन नाइबले दुई दुई विकेट लिए । त्यस्तै मुजिव उर रहमान, राशिद खान, अफताब आलम र रहमत शाहले एक एक विकेट लिए । यसजितसँगै भारतले पाँच खेलबाट ९ अंक जोडेर तेस्रो स्थानमा उक्लिएको छ । पराजित अफगानिस्तान भने प्रतियोगितामा जित विहिन हुँदै अंक तालिकाको पुछारमा रहेको छ ।